Istwa lavi François Nikol Lévy an kreyòl

Chak fwa n ap pase nan Ri 18 lavil Okap pou ale sou plas Dam nan, lajounen tankou lannuit, nou toujou wè yon mesye klè, mens epi ki plen bab blanch, chita devan yon pyano; se swa l ap jwe, oubyen l ap ekri kèk bagay. Li konn byen ta : nou menm konn mande tèt nou si li pa janm dòmi. Anpil moun vin aprann, li se gwo Maestro ki rele François Nikol Lévy a, direktè mizikal Òkès Septantriyonal: yonn nan djaz Ayisyen ki pi ansyen ki kontinye ap jwe mizik toujou.

Jodia, platfòm Akademizik ap envite w li nan lang kreyòl Ayisyen an, istwa lavi Maestro François Nikol Lévy ki pati pou peyi san chapo nan dat 24 Jen ki sot pase a.

Kiyès Nikol Lévy te ye ?

Foto 1: Maestro François Nikol Lévy, Ri 18, Okap

Francois Nikol Lévy se yonn nan pi gwo pyanis peyi Dayiti konnen. Li te fèt nan lane 1947, nan vil Okap. Papa l se te yon pwofesè ki gen orijin jwif, ki te konn jwe mizik tou epi ki te menm konn anseye sòlfèj. San sipriz, Nikol Lévy te suiv tras papa l, li te vin devlope yon gran pasyon pou mizik. Konsa, li te kòmanse suiv kou pyano nan men manzè Liliane Sam, pitit fi ansyen prezidan Vilbrun Guillaume Sam.
Depi nan lane 60 yo, Nikol Lévy te gentan enpoze l kòm yon gwo bout pyanis nan vil la. Li te konn entèprete repètwa Chopin, Mozart, Beethoven, elatriye. Men, li pa te rete sèlman nan mizik pandan adolesans li. Zanmi danfans li yo, tankou doktè Didier Toussaint, rakonte li te konn jwe foutbòl tou. Se te yon atankan ki te gen anpil disiplin, epi ki te konn fè gwo bout gòl ki make lespri tout moun.
Maestro François Nikol Lévy te blije mete van nan vwèl li, nan lane 70 yo, pou chape poul li anba diktati Duvalier yo. Li te fè yon ti pase Kanada, avan l file pou Lafrans, kote l te fè yon bon ti rete nan vil Bòdo. Pandan peryòd egzil sa, Nikol te pwofite kontinye aprann toujou, li pran kou patikilye, toujou nan pyano. Apre, li te vin patisipe nan yon latriye pwojè ak lòt moun, lòt gwoup : tankou Tanbou Libèté, Soley Leve, pou n site sa yo sèlman.

Maryaj Nikol Lévy ak Septan

Foto 2: Logo ki reprezante Òkès Septantriyonal

Apre yon bèl esperyans aletranje, nan lane 1994, Nikol Lévy retounen nan peyi a. Li te estab Pòtoprens, kote l t ap anseye mizik nan Inivèsite Karayib. Kèk lane apre, li deside rantre nan vil natal li, Okap. Alepòk, Maestro Hulric Pierre-Louis te kòmanse ap antre nan laj. Li pa te ka fè tout bagay menmjan pou djaz la ankò. Konsa, yo te kontakte Nikol Lévy pou vin direktè mizikal Septantriyonal, yon pòs li te okipe pandan anviwon 16 an.
Rive nan Septan, Nikol Lévy ekri sou fòm patisyon tout ansyen mizik djaz la, pou fasilite nouvo mizisyen yo jwe yo. Se te yon gwo travay, ki te egzije anpil tan ak ekspètiz. Konsa, li konpoze nouvo mizik, li aranje mizik, epi li fè yon ekilib ant filozofi djaz la ak nouvèl tandans mizikal yo. Pami mizik Nikol Lévy konpoze yo, nou ka site : La Capoise, Demen, Si ou te konnen...

Lanmò Maestro Nikol Lévy

Foto 3: Maestro François Nikol Lévy

Ane 2020 an pote anpil dlo nan je nan lemonn antye. Kòmanse ak ensandi forè Ostrali, pase nan rivalite ant Etazini ak Iran, lanmò basketè Kobe Bryant, pou tonbe nan pandemi Covid-19 la. Pandemi sa pote anpil moun ale nan tout rejyon sou latè. Epi li paralize tout sistèm swenyay. Sa ki rann moun ki fè lòt maladi nan gwo difikilte pou jwenn swen, sitou nan yon peyi tankou Ayiti.
Se nan yon kontèks konsa, nan dat kite 24 Jen bò 2è nan maten, Maestro Francois Nikol Lévy fè vwèl pou peyi san chapo. Li te gen 73 an sèlman : kidonk, li te gen anpil ane devan l pou te mete lajwa nan kè djokannèl yo. Men yon aksidan serebwo-vaskilè pa te ba l chans. Kouri Lopital Sacré Cœur nan Milo, tonbe Lopital Bernard Mevs… fè operasyon an ijans men mouche lanmò pa te pran koulè.


Nikol Lévy mouri pandan Septan t ap prepare l pou fete 72 an egzistans li nan dat 27 Jiyè a.

Kidonk, djaz la menm pi gran pase estil mizikal ki rele Konpa a. Se yonn nan gwoup mizikal ki pi ansyen ki kontinye ap jwe mizik toujou sou latè beni san kanpe. Maestro François Nikol Lévy kontribye anpil nan siksè sa.

Pou sa, ekip Akademizik la rann yon omaj byen merite a gwo potorik gason sa, ki rete yon moniman nan sèktè mizik Okap la, pou nou pa di pou tout peyi a an jeneral.

  • Otè : Micky-Love Mocombe, mocombe26@gmail.com

3 commentaires sur “Istwa lavi François Nikol Lévy an kreyòl

Ajouter un commentaire

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s

Créez un site ou un blog sur WordPress.com

Retour en haut ↑

%d blogueurs aiment cette page :