Yon spektak klasik san parèy nan vil Okap avèk flitis Nannley

Samdi ki te 14 Novanm nan aprè midi, « Complexe Versailles », palè kilti lavil Okap, ansyen podyòm konkou « Génie Royal National », te akeyi nan lokal li yon gran spektak klasik san parèy. Spektak sa se te yon resital ke yon jèn flitis ayisyen ki pote non Jacques Nannley Duverly, t ap prezante pou l te selebre 10 zan karyè mizikal li, epi an menm tan tou pou komemore 250yèm ane nesans Beethoven.


Si ane 2020 sa make 350yèm ane egzistans vil Okap, li make tou, souvni 250yèm ane nesans Ludwig Van Beethoven, yon gran konpozitè e pyanis alman ki trè remakab atravè gran peryòd istwa mizik klasik oksidantal la, otè selèb Neuvième Symphonie, yon melodi ki te vin devni im ofisyèl Inyon Ewopeyèn. Nan sans sa, Nannley Duverly, ki se yon jèn flitis ayisyen k ap evolye nan vil Okap, pa t rate okazyon sa ane sa pou komemore souvni 250yèm ane nesans gran konpozitè sa e an menm tan tou selebre 10 zan karyè mizikal li avèk yon resital.


Nan yon dekò trè senp, ki gen yon gran pyano akoustik nwa ki enstale, yon bouke flè, ak yon flit travèsyè dore ki byen plase, devan yon piblik seleksyone, nan yon atmosfè silansye, Urielle Antenor, MC spektak sila, entwodui resital la pou prezante flitis Jacques Nannley Duverly ak repètwa mizikal li te prepare ak anpil swen ansanm ak 4 gran pyanis klasik : Angélot Bélizaire, Enoch Firmin, Marie-Lyne A. Philémy ak Fénor Onésime. Spektak klasik sa se te yon vwayaj ki te chaje ak divès emosyon atravè entèpretasyon enstrimantal plizyè konpozisyon nan diferan gran epòk mizik klasik tankou Klasik, Womantis, Modèn.


Vwayaj sa te kòmanse ak yon entèpretasyon flit, an solo, de Syrinx , ki se yon pyès mizikal de Claude Débussy, yon gran konpozitè fransè ki soti nan kòmansman epòk Modèn. Ansuit, akonpanye de pyanis Angélot Bélizaire, flitis Nannley te mennen spektakè li yo nan epòk Klasik pou fè yo odisyone, Moonlight Sonata de Beethoven, premye mouvman nan yon pyès mizikal konpozitè selèb sa. Se yon mòso ki make avèk anchènman plizyè akò apèj, trè dou, lan, epi tris. Men vwayaj la pat rete la sèlman, li te kontinye li toujou nan epòk Klasik avèk Dance of the blessed spirit de Christoph W. Gluck, akonpanye de pyanis Enoch Firmin, Dwayen fakilte mizik nan Inivèsite Limonad.

Entèpretasyon Dance of the blessed spirit de Christoph W. Gluck, flitis Nannley akonpanye de pyanis Enoch Firmin


Aprè bèl vizit sa nan epòk Klasik la, flitis Nannley te mennen spektatè li yo avèk pyanis Marie-Lyne A. Philémy, nan epòk Womantis avèk entèpretasyon Le Cygne, Nocturne Opus 9, de Frédéric Chopin, yonn nan selèb pyanis 19yèm syèk.

Entèpretasyon Le Cygne, Nocturne Opus 9 de Frédéric Chopin, flitis Nannley akonpanye de pyanis Marie-Lyne A. Philémy

Nan mitan vwayaj sa, Marie-Line Philémy, inik pyanis fanm spektak klasik sa, te prezante yon bèl entèpretasyon vokal de Ave Maria (Franz Schubert) ki fè suit a yon entèpretasyon flit de Nannley, akonpanye de pyanis Angélot Bélizaire.

Pakou vwayaj sa te kontinye avèk entèpretasyon plizyè lòt bèl pyès mizikal ke spektatè yo te viv avèk anpil admirasyon tankou Concertino, Op. 107 de Cécile Chaminade, II Pastore Svizzero de Pietro Morlacchi, Pan et les bregers de Jules Mouquet, Queen of the Night Aria (Opera The Magic Flute) de Mozart, ak Csardas de Vittorio Monti, ki se te yon pèfòmans enpresyonan akonpanye de pyanis Fénor Onesime. Vrèman vre, vwayaj sa te chaje ak anpil emosyon e spektatè yo te montre satisfaksyon yo atravè divès ovasyon.

Avan pèfòmans dènye pyès mizikal pou mete fen nan bèl vwayaj sa, se te ak yon pwofon santiman de rekonesans ke Nannley te adrese lapawòl pou l remèsye manman l ak ti frè l ki te vin asiste l e ansuit papa l ki ta p suiv spektak sa anliy. Nan menm moman sa, li te pwofite remèsye yon fason espesyal pyanis yo ki te akonpanye li, Angélot Bélizaire, Enoch Firmin, Marie-Lyne A. Philémy ak Fénor Onésime.

Li te kontinye temwanye santiman rekonesans li anvè Tchoupy Hylaris, ansyen pwofesè mizik li nan lekòl ’’Cemuchca’’, epi remèsye tout moun ki te deplase pou vin asiste spektak sa, san konte kèk pèsonalite remakab ki te prezan tankou Donald Victorin, pwofesè mizik nan fakilte Boza Inivèsite Kretyèn Nò Dayiti ak nan Inivèsite Limonad, Welele Doubout, tanbourinè e pwofesè nan lekòl mizik Sainte-Trinité. E se te vrèman nan okazyon sa ke Nannley Duverly te resevwa yon kado de Welele Doubout, yon konpilasyon de 10 ritm ayisyen pou tanbou ki pote non Chansons d’Haïti.

Pou komemorasyon 250yèm ane nesans konpozitè Beethoven ak selebrasyon 10yèm ane karyè mizikal flitis Nannley, resital sa se te vrèman yon spektak klasik san parèy nan vil Okap.


  • Otè : Rémy Junior Monexant, etidyan finisan nan Fakilte Edikasyon ak Boza nan Inivèsite Kretyèn Nò Dayiti (UCNH). Imel: remyjunior01@gmail.com

4 commentaires sur “Yon spektak klasik san parèy nan vil Okap avèk flitis Nannley

Ajouter un commentaire

  1. Mwen kontan wè kijan ou dekri sware sa byen anba kout plim ou Rémy. Mwen mete chapo ba devan akademizik. Epi Bravo la kontantman tou pou gwo travay n’ap fè nan lang manman nou nan domèn mizik la ki touche plis moun de fason vityèl ! Mwen sitou apresye fason ou chwazi chak plan imaj ki nan atik la, li fè moun rete bèkèkèèèè…..
    Kenbe la zanman’m !

    J’aime

  2. M vreman kontan we Jan ou te dekri sware klasik sa san dout ki te yon bel sware ki te byen prepare pa tout bon mizisyen sa yo men m reyalize menm sim pat ka la men avek tout detay ak enfomasyon ou bay tout moso mizik yo ak nan ki epok nan istwa mizik klasik yo ye fem santim te la e fem santi ke moun yo te fe yon bon Bagay bravo m renmen travay la sa fe nou we gen moun kap travay e Fe bon repotaj nan domenn mizik la spesyalman nan kesyon mizik klasik nan level profesyonel bravo Mayestro Remy kontinye ban nou bon enfomasyon sou mizik lang manmann ak lang papann mesi

    J’aime

Répondre à Jean Ruben Annuler la réponse.

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s

Créez un site ou un blog sur WordPress.com

Retour en haut ↑

%d blogueurs aiment cette page :