Biyografi Ludwig van Beethoven an kreyòl

Ane 2020 sa make souvni 250yèm anivèsè Ludwig van Beethoven, yon gran konpozitè alman trè remakab atravè gran peryòd istwa mizik klasik oksidantal la. Men, kijan istwa lavi gran mizisyen sa te ye?

Platfòm Akademizik ap envite w li an kreyòl biyografi gran mizisyen klasik sa.


Ludwig van Beethoven te fèt 16 ou 17 desanm 1770 nan lavil Bonn, ansyen kapital Repiblik Federal Almay (1949-1990). Li te dènye gran reprezantan epòk klasik nan istwa mizik e pyonye nan epòk romantik. Malgre li te vin soud, sa pat anpeche l konpoze mizik e zèv mizikal li yo te kite yon gran enfliyans nan mizik oksidantal la atravè XIXe syèk la.

Ludwig se te 2yèm nan yon fanmi ki te gen 7 pitit. Papa l, Johann van Beethoven, se te yon mizisyen alkolik epi l te brital, e li te bay pitit li yo yon levasyon trè rijid; Manman l, Maria-Magdalena van Beethoven, te yon moun timid epi melankolik.

Menm jan ak Léopold Mozart ki te entwodwi ti Mozart nan mizik depi nan timoun, se konsa tou Johann te vin dekouvri talan mizikal Ludwig, epi l te kòmanse ba l leson mizik depi nan laj 4an pou l te ka fè l devni tankou Mozart.

Anviwon 1778, Ludwig te jwe yon konsè ki te deja montre talan ke li genyen. 3 zan pita, Ludwig te oblije kite lekòl paske sitiyasyon finansye fanmi li pat kapab reponn. Men sa pat fè li dekouraje kontinye aprann mizik.

An 1782 Ludwig te rankontre Pwofesè Christian Gottlieb Neefe. Sou direksyon pwofesè sa a, Ludwig te etidye « Le Clavier bien tempéré » de Jean Sébastien Bach ak sonat pou klavsen de Carl Philipp Emanuel Bach. Etid ak travay pratik zèv mizikal sa yo te pèmèt li konble teknik li yo nan klavye. Dezan pita, Ludwig te vin asistan pwofesè Neefe nan chapèl Bonn. Nan peryòd sa, li tap ranpli fonksyon kòm dezyèm òganis, mizisyen òkès ​​ak kòm pwofesè.

An 1787, Ludwig te ale vizite lavil Vienne, kote li te rankontre Mozart ki te gentan ap mennen nan epòk sa. Aprè rankont sa, Mozart te dekouvri nan Beethoven yon mizisyen ki gen anpil avni e ki trè pwomèt.

Aprè kèk semèn, Ludwig resevwa nouvèl ke manman l sikonbe akòz tibèkiloz. Manman l te ale kite fanmi an nan dèy alòske papa l pa t kapab asime responsablite fanmi an aprè lanmò sa. Depi lè sa a, tout responsablite chèf fanmi an tonbe sou zepòl Ludwig.

Ludwig te gen yon admirasyon pou Napoleon Bonaparte. Li te menm konpoze epi dedye Twazyèm Senfoni li (ki rele Ewoyik) a « Bonaparte ». Men, Ludwig te vin siprime dedikas sa lè li aprann ke Napoleon te pwoklame tèt li kòm anperè.

Nan fen 1792, Ludwig te vin enstale l a Vienne, ki konsidere jodi a kòm kapital mondyal mizik. Kèk semèn aprè, li vin aprann nouvèl lanmò papa l. Men, Ludwig te kontinye acheve etid mizik li yo e li te pwofite resevwa leson konpozisyon nan men Joseph Haydn pandan ki te enstale a Vienne. Aprè kèk ane, Haydn te vin mouri.

Ludwig kontinye aprann epi ogmante repitasyon li kòm yon gran pyanis. Talan li genyen nan jwe pyano ak nan enpwovizasyon te fè anpil moun apresye li. Li te kòmanse yon seri de konsè ki mennen l nan plizyè vil tankou Nuremberg, Berlin, Prague, Budapest… Sepandan, li pa t sispann konpoze mizik.

« Mizik se tankou yon rèv ke mwen pa ka kontinye tande« , sa se deklarasyon Ludwig ki te kòmanse soufri de yon pèt odisyon pwogresif depi 1796 ki ta pral vin total. Andikap sa a te anpeche l pèfòme sou pyano, men l pa t anpeche l konpoze pi gwo zèv mizikal li yo.

Nan fen 1799, li te deja gen anpil travay nan repètwa li a: triyo, kwatyò pou kòd, de konsèto pou pyano, plizyè varyasyon ak sonat pou pyano.

Anpil ane ap pase e Ludwig vin wè rèv li pou l fonde yon fanmi vin mwens posib. Li te gen yon frè l ki te vin mouri, Ludwig te deside pran responsablite l kòm paran pou l te okipe neve li, Karl. Men, sa pa t kapab kontinye pandan lontan…

Tout difikilte sa yo te deteryore kondisyon fizik Ludwig e an 1819 li te vin konplètman soud. Ki fè, konpozitè a pat janm tande gwo zèv mizikal li te konpoze nan dènye tan yo tankou: la Neuvième Symphonie, la Missa Solemnis, la Grande Fugue pou 2 vyolon, alto ak vyolonsèl, La Consécration de la Maison ak 33 Variations sur une valse de Diabelli.

Anviwon 1819, Ludwig te izole tèt li, epi kominike sèlman nan ekri ak lòt moun. Ekri sa yo kolekte sou non Kaye de konvèsasyon.

Dènye jou gran mizisyen sa te make pa pwoblèm sante ki te vin pi grav. Mwa Desanm ane 1826, eta sante mizisyen an te vin deteryore. Aprè anpil soufrans li de nemoni ak siwoz, Ludwig van Beethoven pati pou peyi san chapo 26 Mas 1827.

Lavil Vienne te rann mizisyen li yon gran omaj nan antèman l ki te genyen plis pase 20,000 moun.

Pages: 1 2

3 commentaires sur “Biyografi Ludwig van Beethoven an kreyòl

Ajouter un commentaire

  1. Felisitasyon pou bèl kontni sa yo sou mizik nan lang kreyòl ayisyen an. Se premye fwa mwen resi li biyografi Beethoven an kreyòl.
    Mwen ankouraje nou kontinye bèl travay sa…

    J’aime

Répondre à Samentha Vixamar Annuler la réponse.

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s

Créez un site ou un blog sur WordPress.com

Retour en haut ↑

%d blogueurs aiment cette page :